काठमाडौं, भाद्र २५ । अदालतको अवहेलनासम्बन्धी मुद्दामा कान्तिपुरका प्रबन्ध निर्देशक कैलाश सिरोहियालगायत चारजना कान्तिपुरकर्मीको बयान भोलिदेखि हुने भएको छ । बयानका लागि कान्तिपुरका अध्यक्ष तथा प्रबन्ध निर्देशक कैलाश सिरोहिया, निर्देशक स्वस्तिका सिरोहिया, कान्तिपुर दैनिकका सम्पादक सुधिर शर्मा र वरिष्ठ सहायक संवाददाता घनश्याम खड्का बुधबार अदालतमा उपस्थित भएपनि भोलिदेखि मात्रै सुनुवाइ हुने भनेर फर्काइएको थियो ।
यस्तै, कान्तिपुरका स्तम्भकार विजयकुमारले पनि आफूविरुद्ध परेको अवहेलना मुद्दाको जवाफ बुधबारै सर्वोच्चमा बुझाएका छन् । अदालतको अवहेलना हुने गरी समाचार प्रकाशन गरेको भन्दै सर्वोच्च अदालतमा कान्तिपुरविरुद्ध दुईओटा मुद्दा दर्ता भएका थिए ।
दुबै मुद्दाको सुनुवाइ गर्दै गत बैशाख र आषाढमा न्यायाधीश गोपाल पराजुलीको इजलाशले कान्तिपुरले अदालतको अवहेलना गरेको ठहर गर्दै बयानका लागि बोलाएको थियो । कान्तिपुरले पराजुलीको न्यायाधीशमा सिफारिस र संसदीय सुनुवाइको क्रममा परेका उजुरीलाई लिएर विभिन्न समाचार प्रकाशन गरेको थियो ।
कान्तिपुरविरुद्ध परेको मुद्दाको बयान बुधबार (आज) हुने भनिएकाले उनीहरुसँगै अदालतमा बयान सुन्नका लागि ठूलो संख्यामा कान्तिपुरकर्मी र सञ्चार संस्थाका प्रतिनिधि पनि अदालत पुगेका थिए ।
0 comments:
Speak up your mind
Tell us what you're thinking... !