अमेरिकाद्धारा लडाकुहरुविरुद्ध हवाई आक्रमण, अर्का पत्रकारको पनि हत्या गर्ने आइएसको धम्की

काठमाडौं, भाद्र ५ । अमेरिकाले उत्तरी इराकमा सक्रिय इस्लामिक स्टेट (आइएस)का लडाकुहरुविरुद्ध हवाई आक्रमण गरेको छ । अमेरिकाले आक्रमण जारी राखे आफ्नो कब्जामा रहेका अर्का अमेरिकी पत्रकारको पनि हत्या गर्ने आइएसको धम्कीका बाबजुद अमेरिकाले नयाँ आक्रमण गरेको हो ।

आइएसविरुद्ध मोसुल नजिक संघर्ष गरिरहेका कुर्दिस र इराकी सेनाहरुलाई हवाई सुरक्षा प्रदान गरिएको अमेरिकाले जनाएको छ ।

गत मंगलबार मात्र आइएसले सन् २०१२ देखि हराइरहेका अमेरिकी पत्रकार जेम्स फोलेको हत्या गरेको भिडियो सार्वजनिक गरेको थियो । उक्त भिडियो सार्वजनिक भएलगत्तै अमेरिकाले मोसुल बाँध नजिक १४ भन्दा बढी पटक हवाई आक्रमण गरेको थियो । अमेरिकी आक्रमणको बदलामा फोलेको हत्या गरिएको आइएसको तर्क छ ।

अमेरिकी राष्ट्रपति बाराक ओबामाले भने फोलेको हत्या अन्तरआत्मालाई मर्माहात पार्ने खालको भएको प्रतिक्रिया दिएका छन् ।

यता, पेन्टागनले भने सिरियामा लडाकुहरुको कब्जामा रहेका अमेरिकी नागरिकलाई उद्धार गर्ने प्रयास सुरु गरेको जनाएको छ ।

गत अगष्ट ८ देखि इराक र सिरियाका विभिन्न भाग कब्जा गरेका आइएसविरुद्ध अमेरिकाले हवाई आक्रमण गरेको छ । (एजेन्सी)