संसद् – समय माग

व्यवस्थापिका–संसद्को आजको बैठकमा समय माग गर्दै सांसद अर्जुनप्रसाद जोशीले मुलुकको अर्थतन्त्रमा विप्रेषणको योगदान रहेको भएपनि वैदेशिक रोजगारीमा जाने कामदारहरुको समस्या सम्बोधनका लागि सरकारले यथोचित कदम चाल्न नसकेको गुनासो गर्नुभयो ।
उहाँले विप्रेषण बढेसँगै विदेशमा काम गर्ने श्रमिकहरुको मृत्युदर पनि बढेको र गर्मीयाममा यो झन् बढी हुने गरेको प्रसङ्ग उल्लेख गर्दै वैदेशिक रोजगारीमा जानुअघि रोजागारीमा जानेहरुका लागि ऋण, तालिम र प्रशिक्षण दिनुपर्ने बताउनुभयो ।

उहाँले  वैदेशिक रोजगारीमा जाने नेपाली कामदारहरुले भोगेका समस्याहरुको समाधानका लागि सरकारले विशेष ध्यान दिनुपर्छ भन्नुभयो ।

अर्का सांसद शक्तिबहादुर बस्नेतले डोल्पामा यार्सागुम्बा टिप्ने क्रममा हत्या, लुटपाट र गोलीकाण्डसमेत भएकामा त्यसको रोकथामका लागि सरकारले तत्कालै कदम चाल्नुपर्ने बताउनुभयो ।

उहाँले वैदेशिक रोजगारी गएका नेपालीहरु अङ्गभङ्ग भएर फर्कने क्रम बढेकाले उनीहरुको सामाजिक सुरक्षाका लागि सरकारले ध्यान दिनुपर्ने बतउनुभयो ।

सांसद डिल्लीप्रसाद काफ्लेले नक्कली बीउका कारण धानबाली नष्ट भएका भक्तपुर र काभ्रेका किसानलाई क्षतिपूर्ति दिन माग गर्नुभयो ।

सांसद हरिचरण शाहले सर्लाही र महोत्तरीका उखु किसानले तोकिएको मूल्यअनुसारको भुक्तानी नपाएकाले उनीहरुको समस्या सम्बोधन गर्नुपर्ने तथा सुनसरीको चतरामा खोलाको किनारामा जोखिमपूर्ण अवस्थामा बसेको सुकुम्बासीको बसोवासको व्यवस्था गर्नुपर्ने बताउनुभयो । रासस